सिन्धुली, १७ जेठ – सदरमुकाम सिन्धुलीमाढी बजारलाई सुरक्षित बनाउन सिन्धुली उद्योग वाणिज्य संघको पहलमा सिसि क्यामेरा जडानको तयारी सुरु गरिएको छ ।
सिन्धुली उद्योग वाणिज्य संघले सोमबार आयोजना गरेको सिसि क्यामेरा जडान सम्बन्धी बैठकमा सरोकारवालाले कमलामाई नगरपालिकाको बजार क्षेत्रलाई सुरक्षित र व्यवस्थित बनाउन सीसी क्यामेरा जडानका लागी सिन्धुली उद्योग वाणिज्य संघको संयोजकत्वमा गैर सरकारी संस्था महासंघ, लोकतान्त्रिक गैसस महासंघ, पत्रकार महासंघ, वित्तिय संस्था सम्मीलित पुर्व तयारी तथा आर्थिक ब्यवस्थापन समिति निर्माण गरेको छ ।
बढ्दो शहरीकरणसँगै समाजमा अपराधका घटना बृद्धि हुँदै गएको भन्दै नगरलाई सुरक्षित बनाउँदै शान्ति सुरक्षा कायम राख्नको लागि माढीबजारका झण्डै एकसय वटा सिसी क्यामेरा जडान गर्दा झण्डै ३० लाख खर्च लाग्ने उद्योग वाणिज्य संघ सिन्धुलीले जनाएको छ ।
छलफलको अवसरमा प्रमुख जिल्ला अधिकारी तारा बहादुर कार्कीले अपराध र अपराधी समाजमै हुने भएकाले सिसी क्यामेराको जडानले समाजमा हुने अपराधलाई न्यूनीकरण गर्न मद्दत पुग्ने हुँदा यसलाई तत्कालन सबैपक्ष लागेर जडान गर्नुपर्ने बताए ।
जिल्ला प्रहरी कार्यालय सिन्धुलीका प्रहरी उपरीक्षक उमासंकर पंजीयारले परम्परागत सुरक्षा प्रणालीको अन्त्य गर्दै सुरक्षामा प्रविधिको प्रयोग गरी प्रमाणमुखी अनुसन्धानलाई अवलम्बन गर्न र अपराध रहित नगरको रुपमा परिचित गराउन सीसी क्यामेरा जडान कार्यले महत्वपूर्ण सहयोग पुर्याउने बताए ।
संघका अध्यक्ष बिनेश कुमार श्रेष्ठले नगरलाई सुरक्षित बनाउनका लागि सिसी क्यामेरा जडान गर्न लाग्ने खर्च जिल्लामा रहेका बैंक तथा बित्तिय संस्था, जिल्ला विकास समिति, कमलामाई नगरपालिका, ब्यवसायी र गैर सरकारी संस्थाहरुसँग संकलन गरिने बताए ।
कमलामाई नगरपालिकाको ढुंग्रेबास बजार देखी बुद्धनगर चोक सम्म साथै बजार क्षेत्र, बसपार्क क्षेत्र र धुराबजार क्षेत्रमा क्यामेरा जडान गरिने जिल्ला प्रहरी कार्यालय सिन्धुलीले जनाएको छ । उक्त क्यामेरा जडान पश्चात कमलामाई नगरको बजार क्षेत्र २४ सै घण्टा सीसी क्यामेराको निगरानीमा रहने भएको छ ।
0 comments:
Post a Comment